Somplelea Tiatristank Xrod’dhanjoli - John Gomes Kokoy

Somplelea Tiatristank Xrod’dhanjoli
- John Gomes Kokoy

CARMO ROD

Ek Mhan Kantorist Greg bhaxentlean mousike mhollear
mousikos sobdantlo vixexonn ani to khoinchei kolek
zanv kovita, nattok ani nach, kivam songitak ani vadan
kaddil’lea avaza khatir vapuddttale. Romkaramni, Greg
lokam koddlean songit usnnem ghetlem ani Latintlem
musica aslem tem Konknnint muzgaponn zalem. Eka
kallar, vhoddlea ani sumarachea muzgancheo balvaddeo
mhollear Igorjecheo xalla axil’leo – teo atam
zhollkonant. Lok- priya ani namnnechim songitkaram ani
kantoristam Bharot bhor Hindi cholchitram sobhoitat.
Amchea adlea kaim tiatristamni oslea balvaddeancho
boro faido kaddlo ani dekhunuch te songit xikle ani
tachea adharan nove-nove sur rochle ani aplim kantaram
surngailim. Solfam noko asleleamni ap-aplea bhejeancho
upeog kelo, karonn kosloi novo sur jikhun dhorpant te
borech laik axil’le. Thodde crooner bore, punn tanche
kodden novim ghoddpam vo gitam rochunk tank naxil’li.
Oslea mhan kantoristam modlo amcho ek somplolo
tiatrist mhollear: CARMO PIEDADE RODRIGUES.

Amam Goenkarank songitachem pixem laglolem asa ani
dekunuch zolmak thavn moro porian ami hea bolladik
hotiaracho upeog kortanv. Songit mhollear ‘sonvsarik
othmik bhas’ hem konnacheanuch visrunk zaina.
Kerollantlea Divine Retreat Centre hatunt nnov
satolleancho retir kortana, ami thoim songitacho
kitlea toramni vapor kortat tem khas dolleamni
pollelem ani kanamni aikolem. Jin’sam bhasamni
(Inglez, Moratthi, Hindi, Telugu, Tamil, Malayalam ani
Konkni) zovoll zovoll xembor odhikuch bhokti gitam ami
aikolim, hem zalench; tea bhair songitachea adharan
gorvam-mhosranchem dud vaddovpant adhar zata ani
zhaddam sud’dam songitachea nadar borim follam-fulam
ditat, hem-i pollevn kaddlem.

NIRMONN cholchitrant NACH ATANCHE hem git CARMO ROD
hachea avazan A.R.Souza Ferrao chea onttancher ami
aikolam. He ghoddnuke udexim tea cholchitrak loklok
choddlo hem konnacheanuch bason vocho nezo. Oxem
sangtat ki tem rikordd korche adim, onek gavpeanche
talle topaslole mhunn ani akhrek CARMOcho avaz eog’eo
oso mell’llo mhunn.

CARMO, Osollnnechea Orelant Julaiache 16ver 1939 vorsa
zolmolo Agostache 13ver, 1975 vorsa, to Mumboint
somplo. Tacho nimanno haves ballgun, Osollnneant tache
kuddicher xevottache sonvskar korpant aile. Tachem
pret ghorantlem bhair kaddttana, muzgamni jen’na
tannem fank zoddil’lea OPINION POLL gitacho sur
sovkasaien vazoilo, ten’na hajir axil’lea soiream ani
ixtt-mitranchea dolleantlean ghosghoxit dukam
vanvtalim. Tachea mornnan, Maria-k ghorkar ani eklech
dhuvek bapui nam zalo, Jennifer, tacho bhavui bi ek
tiatrist ani sodheak Kuwait asta.

Survek, CARMO Inglezintlean logna dobajeank ani
bhovxik nachank gaitalo. Tacho kherit ek nog mhollear
torekvar Konknni lok-gitanchi bhoros (Ami chedde,
bhangra gulle.., Chol nachum-ia, vazoi tujem toblem,
adi, adi). Ten’na to barik-sarik AVC-int tiatramni
nhestalo. Vevsaik Konknni machier poilem pavl tannem
Bhangwaddi rongbhuincher dovorlem. The Goan Dramatic
Group hannim ek ugtti spordha addail’li zantunt xoukin
toxech vevsaik gavpi vantto ghetale. VOL hea gita
udexim CARMOn poilem inam’ melloilem.

Hea vhoddlea zoitan to, C. Alvares, Robin Vaz, Alfred
Rose, Jacint Vaz, John Claro, Jephsis Hitler, Kokoy
ani sabar dusrea digdorspeanchea tiatramni gitam ani
sovongam korun, Goenkaram modlo Pat Boone koso
chokmoklo. Ek sarkhim dha vorsam tannem Konknni machi
gazoili. CARMO, Saxttintlea fanki songitkar,
Chinchonnecho somplolo Carlito Rodrigues hachea Radio
Serenaders ani Vell’lechea Josinho mestrichea AVC Pops
hea donui pongddank gavun, borich namna zoddunk
pavlolo.

Tiatristponnant astana, CARMOn he tiatr machier
haddle: SOMDIRAN, AFRICA, AVOICHI AS, DEVACHO HUKUM –
PADRICHO GHUTT (jidik poddon ekech ratiam modem
boroilolo tiatr), GRESTKAIEK LOBDON ani TEGANKUI FAXI
FAVO (nimanne tin tiatr rochpi hanvuch axil’lom).
OPINION POLL, INDEPENDENCE, BHANGRACHEM XITU, XIKOP
GORJECHEM, MARLON BRANDO ani VONIM-DEOR – him tannem
mhonnlelim gitam borinch gazlim. Carmo-Anita hanchem
zoddpem eka kallar borench chokmoktalem ani tanchea
zodd-gitancho (zoxim: PARCEL RAKHO & KOREZM)
tiatr-pollennar azun ugddas kortat. Punn Opinion Poll
hea gitant mat tannem aplo khoro jadu dakholl kelo.
Tannem gaileleam modlem sogleam von bes borem git
khoinchem? Oso ami vichar kortoch, to taboddtob zabab
ditalo: Poilem – OPINION POLL, dusrem – OPINION POLL
ani tisrem – OPINION POLL. Hangasor, mhaka spoxtt
sangin dista ki: Kitloi avgodd sur jikhun dhorpant ani
punzavpant CARMOk lagtolo anik dusro tiatrist
naxil’lo: Goroz ten’na taka gitam ghoddun divpak mhaka
umed ani khuxalkai bhogtali ani unnem odhik 25 tori
novim gitam hanvem tache svadin kel’lim. Moro sor, to
mhaka dhin’vaxi ravlolo.

CARMO, zorui tiatr machier mhojea von fattlo, torui
mhaka boroch lagim aslo. Amche sobhav, gunn
ek-sarkhele – mat tori veglleponn naxil’lem mhollear
zatalem. Svotontrtaiek axel’le ami, amchench khorem
korpi.

Atam ek lhan-xi gozal. 1965 vorsantlea Otumbrant,
Mumboi sakun hanvem Goeam ievpak tharail’lem. Hanv
logni vorgant proves korcho axil’lom. CARMO, Bori
Bunder (V.T.) ixttixnar mhaka pavounk ail’lo. Reil
gaddien suttpachi xitti maril’li. Torui CARMO
ag-ghaddientuch axil’lo. Oin vellar, apunnui Goeam
ievpak raji zal’lo. Hanvem ani Mathilda-n 31.10.1965
tarkher eka-mekak logn-sonvskar dil’lo. Ami Goeant
pavlele tea disak thavn logna dis meren, soglli
maddavoll korpant CARMOn adar ani sohokar dil’lo, hem
mhojean visrunk zaina.

CARMO, zolman gorib zalearui, dekhin songit mogi ani
Devachi kurpa axil’lo utorlo. Pat Boone – ho mukutt
taka poripurnn sobtalo. Spoxtt disnnari ani thav
lagnnari bhitorli sfurti taka iontram fuddem vhortali
ani tulla korum nezo toslea sulakiponnak pavoitali,
VOL, OPINION POLL ani NACH ATANCHE hea tinui gitancher
tiatr ani film pollennar itle vegim visor ghalit oxem
mhaka zalear disona.

Aplo fuddar rosroxit korche khatir to Kuwait gelo. Ani
ekdam thoim pavtokuch tachi bholaiki bigoddli.
Bharotant portolea uprant tachea mendvachem operasanv
kelem. Tem folladik zal’lem ani to Kuwait desant
portolo. Anikui gondoll zavn, CARMOk novean Mumboi
haddlo ani okosmat Bombay Hospitalant tannem prann
soddlo, 13.08.1975. To somptokuch, 1976 vorsantlea Mai
mhoineanche 9 tarkher, B. Salcete hannem borovn
digdorxit kel’lea GHATKI IXTT tiatrant, Voddy-Kunkolle
ratchea 10.00 vaztam PAT BOONE hem kantar hanvem
tachea ugddasak gailolem – zaka lagon mhaka “Boro
kantorist” mhunn sorgest Evagrio Jorge hanchea
hatantlean inam’ favo zal’lem.

CARMO ROD kosleim sovong taddak uddoitalo – tem magir
mogeachem, virachem, kholnaikachem, fokannerachem,
zantteachem vo mhatareachem pasun zanv. Gitam ghoddunk
vo tiatr borounk tache kodden zomlena zait, punn mhan
gaiok ani kolakar mhunn ami taka chepem kaddtanv.
Jephsis Hitler hachea BHAV ANI ZAV tiatrant tannem
aplea khoddegant bhumikank ani rosroxit avazak nimanno
adeus kel’lo.


Copyright 2004 Gulab.